法定古蹟
1908
沙頭角蓮麻坑村
/
革命人士故居
葉定仕故居外觀仿照孫中山先生於中山翠亨村的故居興建。葉定仕（1879 – 1943），又叫天發，號廣新，係沙頭角蓮麻坑葉氏第八世祖。佢早年曾經到泰國做裁縫學徒，之後成立製衣廠，承包軍服生產工作。根據泰國中華會館嘅資料，孫中山先生於 1907 年成立泰國中華會所，爭取海外華人對革命活動嘅支持，葉定仕為共同發起人同創辦人之一。後嚟葉氏擔任暹羅同盟會會長同振興書報社社長，積極推動泰國同盟會嘅發展同捐助革命運動。1936 年，葉定仕同家人重返蓮麻坑定居，直至 1943 年逝世。
葉定仕故居係一座三開間建築，樓高兩層，正面有門廊，用方柱支撐上層陽台。故居主要用青磚同木材嚟起，屋頂係人字瓦頂。正面入口上面有中式吉祥圖案壁畫裝飾，一樓陽台就有琉璃花瓶欄杆，糅合中西建築風格。
資料參考
– 古物古蹟辦事處
